1

睇吓今年月曆，其实好快就到节，想趁假期外游放鬆吓，又係时候开始计划定啦！大家计划行程个阵除咗要安排精彩嘅活动同埋优质嘅食宿之外，其实有样嘢都好重要，就係要确保自己嘅旅程受到全面嘅保障，咁先可以玩得开心又放心！

而其中一样可以保障到大家外游旅程嘅，就係旅游业赔偿基金（赔偿基金）。计划离港外游嘅你，记住留意以下5个必读赔偿基金注意事项!

（一）了解赔偿基金所提供嘅保障

简单嚟讲，外游旅客如果损失左外游费，赔偿基金可以为受影响旅客提供所损失外游费90% 嘅特惠赔偿，呢个情况一般发生喺持牌旅行社倒闭嘅情况下。如果万一唔好彩，外游旅客喺持牌旅行社提供或举办嘅外游活动中意外伤亡，係可以得到总数高达 HK$300,000 嘅特惠赔偿以报销当地医疗、殓葬/遗体（包括骨灰）运返香港以及亲属因旅客伤亡而往访当地所招致嘅实际开支。

（二）知道点为之係外游旅客

话明赔偿基金係保障外游旅客，咁点为之係外游旅客呢？根据《旅行代理商条例》（第 218 章），外游旅客係指已经向持牌旅行社付款购买下列全部或任何两项服务的人，包括：

1）由香港出发去内地或海外嘅交通；

2）喺香港境外任何地方嘅住宿；

3）由持牌旅行社安排喺香港境外任何地方嘅活动。

所以大家要买左上述其中两项或以上嘅服务先喺法例上属于外游旅客，可以得到赔偿基金嘅保障。

而根据呢个定义，旅客如果向持牌旅行社购买以下4类之中任何一类嘅旅游服务，相关交易喺唔属于赔偿基金嘅赔偿範围：

喺香港境外地方集合并解散的一天团； 单独购买机票、船票、巴士票； 单独购买酒店住宿; 购买冇明确指定可以兑换上段所提及任何两种或以上旅游服务嘅旅游现金劵或优惠券。

（三 ） 知道外游费一般包括咩收费项目

一般而言，外游费所包括嘅收费项目总係关乎（a）离港交通；（b）香港境外住宿；（c）香港境外活动（并且同（a）、（b）无关係）之中嘅任何两项。大家可以参考以下一些常见外游收费项目嘅例子：

离港交通：常见例子有机票/邮轮船票、座位升级附加费、飞机乘客离境税、申请费、客运燃料附加费、旅游保险、机场保安税和机场建设费等。

香港境外住宿：常见例子有住宿/房间费、单人房附加费、房间升级附加费、额外加费用、额外早餐费用和邮轮上相类项目的费用等。

香港境外活动：常见例子有主题公园和景点入场费，同埋城市游览的费用等。

（四）记住拣持牌嘅旅行社

购买外游服务嗰阵，无论你係上网买，定係去实体店买，记得一定要向持牌旅行社购买先可以得到赔偿基金嘅保障。旅行社嘅牌照号码係有六位数字，牌照号码字头会係“35”或“24”。如果大家唔清楚你地想帮衬嘅旅行社有冇持有有效牌照，可以浏览政府旅行代理商注册处网页查询（网址: https://www.tar.gov.hk）。

（五）确保取得印花收据嘅正本

如果大家买左多过一项外游服务（即係第（二）点所讲嘅三项服务中嘅两项或以上）， 就记得攞到付款收据正本后，一定要睇清楚收据上有冇盖上印花（印花式样见下列两图）。印花都有两样嘢要留意。

首先，大家要留意番印花上面有冇清晰显示徵收嘅金额同日期。记住呢，旅行社係要帮大家缴交相等于已付外游费全数0.15% 嘅印花徵费。例如，如果你俾咗旅行社HK$8,000购买香港至名古屋机票连当地酒店住宿套票，你张付款收据正本上嘅印花就应该显示旅行社已经帮你缴交左HK$12 嘅印花徵费。

仲有呢，大家要留意收据同印花上所显示嘅旅行社名称同牌照号码，係咪同大家帮衬嘅旅行社一样。

因为持有盖上印花收据正本嘅外游旅客，先会受到赔偿基金嘅保障。如果发现有唔妥，记得提你地帮衬嘅旅行社纠正返呀。如果想查询或投诉有关印花徵费嘅事宜，可以致电香港旅游业议会（电话：2969 8188）。

由传统印花机发出嘅徵费印花嘅式样：

由电子印花徵费系统发出嘅徵费印花嘅式样：

了解完赔偿基金5个注意事项，出发前亦要记得买番份适合自己嘅旅游保险，双重保障先係最醒！

想知更多关于旅游业赔偿基金嘅详情，可以浏览www.ticf.org.hk。