1

GM Diet美国奇迹食谱减肥
一星期真係减到8KG？

到底甚幺是奇迹食谱GM Diet呢？其实GM是代表美国通用汽车公司（General Motors）。1985年，GM为了可以提升员工的健康，从而得到生产效率，因而得到美国食品药品监督管理局、美国农业部协助而研发的GM Diet。

美国奇迹食谱减肥GM Diet

号称不用运动、极速且健康的GM Diet是标榜只需7日的时间，有系统地摄取大量低热量的蔬果，另外，也配合吸收複合式碳水化合物如糙米，并且喝大量水来减重，根据统计，GM员工因为食谱，而平均每人减了约4.5 – 8kg。由于这个方法能在短时间内减肥及见效，不少人用作短期有效减肥的手段，这次编辑部决定实测一星期GM Diet，试试係咪真係减到咁多！

《新假期》编辑部5人实测GM Diet！过程＋结果大公开！
GM Diet号称一星期减到8公斤真唔真？（足本影片在文章最底！）

新假期编辑部5人实测GM Diet！ 打开[emailprotected] 即可睇到假期实验室一週IG全纪录

《新假期》IG：传送门

《新假期》实测开始！
记者高矮肥瘦全都有 平均减到几KG？

背景资料：

编辑部参加者共5人，包括：

男记者：Garie
女记者：肥龙、饭饭、菜、苗

6月15日为实测正式开始第一日，初始体重数据如下：

GM Diet Test 第一日：
6月15日（一） 水果日

餐单内容：整天只能进食除了香蕉以外的水果，可少食多餐，不限量任食，另外配上至少8-12杯水。
饮食目的：水果高纤维、低脂、低热量，另外饮用大量的水加速身体排毒。

第一餐（早餐连午餐） 奇异果＋火龙果＋苹果＋梨＋橙＋士多啤梨＋蓝莓水果拼盘

第一日第一餐水果拼盘（编按：做媒体食无定时，经常将早餐加午餐合埋做第一餐，坏习惯切勿模仿，以下略同。）

第二餐 与第一餐分别不大 另外加上葡萄

第一日第二餐都係水果拼盘

第一日的食后感

Garie：万事起头难，第一日真係超辛苦，前一日仲食紧好西，今日就只能食水果??好饿，觉得个人好冻，第二朝瞓教起身只手痺到醒咗，可能无咩血到。

肥龙：记得前一晚食咗打边炉，第一日心谂应该好易过，只可以食生果，但全日个人好肚饿，浑身无力，坐喺office个人係好冻好冻！

饭饭：好X冻好X冻！但原来食生果比我想像中饱肚。

菜：全日食生果好难捱！周身无力！另外，生果推介食苹果同梨，奇异果、士多啤梨好酸！但的确帮助排便！

苗：第一日减重就全日只可以食水果，感觉身体完全未适应到，好饿好饿。

GM Diet Test 第二日：
6月16日（二） 蔬菜日

餐单内容：全日只吃水煮／烤焗／生的蔬菜，早餐可吃一个薯仔，配上至少8-12杯水。
饮食目的：蔬菜纤维丰富、少量蛋白质、脂肪含量极低、薯仔有澱粉可提供能量予日常活动。

第一餐 水煮秋葵＋红萝蔔＋焗薯仔／西兰花／金菇／翠玉瓜

第二日第一餐蔬菜合集

第二餐 -与第一餐分别不大 多了水煮娃娃菜

第二日第二餐都係蔬菜合集

第二日的食后感

Garie：好绿，成檯都好绿，食完个人都清新晒，味蕾得到净化，比起前一日饱，但食完都係好冻。

肥龙：仲未有得去大便，只食菜都开心嘅，学识咗焗菜嘅技巧，发现翠肉瓜同金菇都好好味，食暖嘢个人冇咁冻啊，不过都仲係会饿，无乜热量，夜晚返到去好早训。

饭饭：屙咗好多屎！食菜叫做有啲暖野落肚，有返少少精力！

菜：蔬果可拣茄子、金菇，再配生菜、西兰花会无咁闷！焗一焗更美味，比第一日饱，但好快饿，同样无咩力！

苗：蔬菜选择多，烹调方法都多咗，食到多啲唔同嘅嘢。成个人比第一日更饱肚同有精神。

GM Diet Test 第三日：
6月17日（三） 蔬菜水果日

餐单内容：全日只吃水果及水煮／烤焗／生的蔬菜，配上至少8-12杯水。
饮食目的：水果及蔬菜拥有高纤维及多种植物营养素，多摄取水果及蔬菜，可让身体自我修复。

第一餐 菠萝＋西瓜＋哈蜜瓜＋橙＋火龙果＋奇异果＋葡萄＋蓝莓＋士多啤梨

第三日第一餐 水果拼盘

第二餐 沙律菜＋西瓜＋菠萝＋蜜瓜＋葡萄＋烤茄子翠玉瓜金菇＋水煮秋葵

第三日第二餐 水果拼盘＋菜菇瓜

第三餐 -沙律菜＋西瓜＋菠萝＋哈蜜瓜＋烤茄子翠玉瓜金菇＋水煮秋葵

第三日第三餐与第二餐分别不大

第三日的食后感

Garie：早餐食生果原来唔错，同埋身体好似开始习惯呢种饮食，无咁难捱，个人精神咗，行路都轻盈咗。

肥龙：食生果加上蔬菜，选择弹性较大，但已经有少少厌恶，但都要顶硬上！

饭饭：第一餐一食返生果即刻血糖上升，劲眼瞓。但时间比第1、2日易捱。

菜：食返第一日同第二日既野，好折磨！明明未饱，但已经食到唔想再食！

苗：虽然感觉到身体习惯咗自己食唔饱嘅感觉，但都仲係好想食餐单以外嘅食物。夜晚饿到瞓唔着?

GM Diet Test 第四日：
6月18日（四） 香蕉牛奶日

餐单内容：8-10根香蕉＋4杯牛奶（可改成豆浆）＋8-12杯水

饮食目的：香蕉含丰富的钾质及果胶，提供身体能量。牛奶含钙、蛋白质、矿物质，补充身体营养所需。

第一餐 &第二餐&第三餐 蕉 全部都係蕉＋牛奶

第4日三餐都係蕉，全部都係蕉！ 由朝食蕉食到晚，一日食8条，之后应该短期内都不想再食香蕉。

第四日的食后感

Garie：我觉得自己好似马骝，但今日比前3日是食得最饱的一日。（超市一次过买40条蕉吓亲收银姐姐??）

肥龙：最疯狂的一日！去了三次大便，好畅通愉快，唔使煮嘢食好轻鬆，搅拌机香蕉加奶好好味，但血糖瞬间上升，做嘢时好眼瞓??

饭饭：估唔到香蕉同豆浆係食得最饱最易捱嘅一日，香蕉加豆浆好好味！焗香蕉到底係边个谂出嚟，我到依家仲会谂起浸臭味。

菜：终于有饱嘅感觉！但一日食8条蕉，好多！建议可作多变化，如製成奶昔，但千万唔好焗香蕉，极度不推荐！

苗：虽然唔太喜欢香蕉，但食落真係方便同饱肚～觉得食咁多条香蕉太辛苦／麻烦的话，可以加牛奶打做milkshake，感觉会摄取得比较轻鬆！

（编按：新假期编辑部的共识：食材唔可以平凡地食，煮成其他形态会开心啲。）

传说中的焗香蕉??散发出奇怪的隔夜臭味，获得一致劣评。 香蕉牛奶milkshake，一致好评！

GM Diet Test 第五日：
6月19日（五） 番茄蔬菜豆肉日

餐单内容：每人6个番茄＋水煮／烤焗／生的蔬菜＋500g鱼肉或鸡肉＋12-15杯水。
饮食目的：肉类含蛋白质，鱼肉更有Omega-3，是补充身体所需的重要元素。

第一餐 番茄豆腐汤＋蕃薯苗＋蒜蓉焗杂菇＋柠檬汁罗勒焗鲶鱼

继续发挥创意，将食材煮成不同美食，例如番茄豆腐汤（无添加）。

第二餐 与第一餐大同小异 加上焗茄子及清蒸星斑鱼

第5日第二餐

第五日的食后感

Garie：成餐都係我煮有啲攰lol，只用极极极少量调味，终于有返小小食家常饭的感觉，满足饱肚！

肥龙：全靠Garie帮手煮！真係丰富又好味，调味到位，焗鱼原来可以咁正！！！番茄豆腐汤暖胃又饱肚，之后减肥餐会继续食，少咗澱粉质个人感觉好轻盈。

饭饭：有Garie神嘅加持，终于有餐係食得饱！！如果日日都係咁食法，我係可以继续～

菜：可以食返肉，简直人间美味，而且有蔬菜，均衡营养，饱！另外全靠有Garie大佬，发挥强劲厨艺，食到世上最好减肥美食！

苗：有肉食喇！係7日内食得最饱最享受嘅一日～ 食返有少少调味嘅食物，感动！

GM Diet Test 第六日：
6月20日（六）- 水煮／烤蔬菜日

餐单内容：500g鱼肉或鸡肉＋水煮／烤焗／生的蔬菜＋8-12杯水。
饮食目的：混合多种身体所需的营养素及纤维。
（编按：因为星期六及日是休息日，全员星期五已提前做好饭盒带回家吃）

食饭盒纪录

第6日各自自律食饭盒

第六日的食后感

Garie：放假係应该食好西??但呢一刻嘅我唔可以背叛队友！闻咗当食咗No Problem！

肥龙：星期六要靠自己啦！好想念队友！！！好彩Garie煮定俾我哋，翻热就得啦，但见到亲朋好友开大餐，心情难免有忐忑，但心谂仲有一日，不要放弃！

饭饭：出街食饭係煎熬！见住朋友食肉无得食係最痛苦！我要食肉啊X！！！

菜：六日最难捱，望住大家食好野，有得睇冇得食，而且无同伴一齐，好孤单！

苗：假期无同伴互相监督住，要自律！

GM Diet Test 第七日：
6月21日（日） 糙米蔬果汁日

餐单内容：2碗糙米饭＋任何蔬菜&水果都可进食，或打成果汁饮用。
饮食目的：果汁可助身体排毒，高纤糙米也可以帮助消化，提供身体能量。
（编按：因为星期六及日是休息日，全员星期五已提前做好饭盒带回家）

食饭盒纪录（饮品是红菜头＋甘荀＋苹果打成汁）

第7日各自自律食饭盒＋饮果汁

第七日的食后感

Garie：父亲节无得丧食垃圾食物，感觉有啲怪，虽然今日有饭落肚但感觉好饿，果汁同蔬菜太单调，无肉食係差小小。

肥龙：最后一日！第一次试红菜头、萝蔔、苹果打成汁，颜色超似巫婆汤，饮落口都有青味，尚可接受，食糙米饭加少少蒜蓉好正！

饭饭：最头晕嘅一日，晕到要即刻食啲提子先见好转。但红菜头加苹果加甘荀比我想像中好饮。见大家无破戒，更加觉得唔可以再破戒，唔可以辜负大家！

菜：只有蔬菜同饭，依然冇咩力，出街都好易攰！而且好快饿，要快快赶回家吔饭！另外，撞正父亲节，但冇得食好嘢，好惨！

苗：最后一日，坚持！父亲节，带埋餐盒同屋企人出去食晚饭，望住成枱餸，我只能食自己準备好嘅糙米饭同菜。

GM Diet Test 第八日：
6月22日（一） 完结及结算日

图1）体重变化纪录 图2）体脂变化纪录（只作参考，普通家用体重机数据不一定準确。） 图3）BMI变化纪录 女记者肥龙激减4.4KG，瘦到怀疑人生！

5人GM Diet实测完结感想

Garie：终于完咗地狱一星期，成单嘢係我提出要实测，所以好似无资格怨辛苦？！Btw感谢有队友互相扶持！经过呢一个星期觉得自己除咗体重下降咗以外，最重要嘅係身体係轻盈咗健康咗，成个人无咁水肿，屋企人都话我瘦咗一个Size，同埋皮肤明显好咗。如果是想短期内有瘦身效果的话可以试试，但长期维持的话千万不要，一来太辛苦，二来食蛋白质不够会减少身体肌肉量！长远减肥都係要靠控制饮食，有时间就要运动啦～

正在煮蕃茄豆腐汤的Garie

肥龙：冇谂过减到咁多！全靠队友无条件陪伴我，体重上其实只有我需要减肥，但佢哋都不辞劳苦，陪我买餸煮饭食餐单，更加意识到自律的重要，原来澱粉同糖对人体咁大影响，食少一点个人更加精神，建议大家可以试试，可做到排毒效果，个人感觉更加轻盈，回想返都唔係咁辛苦，因为有同事满满嘅爱，难得减到少少，就唔想放弃！我要争气呀！！！！！！！

真正主角肥龙

饭饭：如何在无油少调味情况煮到大餐请睇我哋拍嘅片！其实有一班朋友同你一齐食係最开心，呢一个星期好似去咗ocamp咁，每日买餸煮饭就过一日，虽然口讲好辛苦，但实际上都几享受。不过问我要唔要再嚟多次就不了，因为太易反弹，同啲皮会鬆啊X！！！

觉得啲皮鬆咗嘅饭饭

菜：最重要係要有人陪你一齐减，会冇咁痛苦！但其实呢个餐单有点太极端，瘦是必然，但同时亦一定会反弹，最重要係之后都要keep住健康饮食，或者可以当呢次係一个改变，从此提醒自己唔好太放肆乱食！

菜：均衡饮食最重要！

苗：觉得GM DIET虽然能有效减重，但饮食上比较极端，唔可以长期进行，适合想急住短期减磅嘅人。虽然好似好废话，但最重要真係平日要养成好嘅生活同饮食习惯（屋企人话我呢星期后皮肤明显好咗）。认真控制饮食，食清啲，效果已经会好好。想试GM DIET又自制能力较低嘅朋友，有同伴一齐互相扶持会好好多～会记住呢7日嘅美好回忆，多谢同事！

苗：我有一日无饮晒啲牛奶.. 减肥最紧要有朋友陪你一齐，事半功倍呀！

注册营养师Michelle专业建议＋Q&A：

Q1. GM Diet能快速减重的原因是？

A1. GM Diet餐单上每一日的平均卡路里摄取量大约800-1,000卡路里，而成年男性及女性每日需要分别摄取约2,200/1,700卡路里，在消耗量大于摄取量的情况下，体重快速下降是正常的。

Q2. 以GM Diet减掉的体重，真的是减肥吗？

A2. 在数据上可以看到，5位的体脂率都没有太大改变，甚至有两位有上升的情况，减掉的只是水份或有机会是肌肉，而正确的减肥是令体脂率下降。

Q3. 建议减肥人士使用GM Diet吗？

A3. 不建议，尤其有糖尿病或血糖不稳的人士切勿尝试，可能会有健康风险。使用餐单的人士因为吸收的热量过低，新陈代谢会减慢，可能会出现专注力不足、无精神、情绪变差、活动力下降等问题。

Q4. 其他建议？

A4. 营养师一般建议减重速度为1星期0.5-1kg左右，以编辑部5人为例，进行GM Diet一星期后，每人至少减重1.5kg，最多减4.4kg，但减重速度过快对身体不是健康的迹象，所以还是建议想减肥的人士，进行健康饮食及配合运动，长期而有效地进行。

Nutrilicious创办人 注册营养师Michelle
Michelle Lau 是营养顾问公司NUTRILICIOUS 的创办人及首席营养师，致力于鼓励及教育亚洲数百万人，让他们吃出健康美丽人生。Michelle和她的团队积极教育所有受众採用均衡有营饮食生活模式，并为不同媒体、品牌、机构主持烹饪示範和健康讲座。

Nutrilicious 营养顾问公司
网址：Facebook

足本版影片

https://youtu.be/58bgfB8Y7Lc