〈好游〉全新人造沙滩 大埔龙尾泳滩

【A&M Diary】耗资约2亿元，首个由政府兴建嘅人工沙滩，位于大埔大尾督嘅龙尾泳滩，终于喺争议声中对外开放！沙滩全长约200米，背靠八仙岭，面对吐露港，旁边就係大美督同船湾淡水湖，环境真係几靓！加上沙滩嘅设施齐全，除咗深得泳客喜欢，亦吸引咗海胆同水母（其实係人类出现咗喺佢哋居住嘅地方）。

前往方法
1. 自驾游：设有70个私家车泊位，平日每半小时为HK$5，至于周末同假日则每半小时HK$20（真係好贵呀）！嫌贵嘅可以揸前少少，睇吓大美督咪錶有无位
2. 单车：好多人都锺意踩单车入大尾督，所以呢度亦设有100个免费单车停泊位
3. 巴士：大埔墟港铁站乘搭75K巴士，喺芦慈田或龙尾村站落车
4. 小巴：大埔墟港铁站乘搭20C小巴，喺芦慈田或龙尾村站落车

龙尾泥滩
前身为龙尾泥滩嘅龙尾泳滩，曾经录得超过400种海洋物种，係香港其中一个生态集中地。所以喺工程展开时，曾惹起极大嘅保育争议。直至我哋嚟沙滩之前嘅一星期，更因为退潮而出现大量海胆同水母，除咗令唔少泳客受伤，更令沙滩嘅生态保育问题再次成为焦点！另外，沙滩两边设有百米长嘅护沙堤，堤外就係原有嘅红树林，更显得沙滩格格不入！

龙尾泳滩
因为海胆同水母嘅出现（其实係人类出现咗喺佢哋居住嘅泥滩），所以沙滩设有唔少警告牌同广播，提醒大家安全；而救护站亦设有急救用品，协助受海胆同水母刺伤嘅泳客。

龙尾泳滩係大埔区内第一个，亦係唯一一个沙滩，铺设约5.5万立方米嘅天然沙粒，行嘅时候发现沙粒尚算幼滑。至于根据环保署自1月以嚟做咗16次嘅水质测试，结果显示水质维持喺最高等级（即为「良好」），我哋就咁用眼睇，发觉水质都算唔错。

沙滩嘅设施亦包括：小食亭、露天茶座、淋浴室、更衣室、防鲨网、洗手间同了望塔等。

<

Tags：好游,全新,人造,沙滩,大埔,龙尾,泳滩,Diary,耗资,

转载：文章来自用户投稿不代表本站观点，如有侵权请联系我们。