〈好食〉叹住冷气食串烧放题 观塘骆驼漆欢喜烧

【A&M Diary】M佬今日突然同我讲，佢好挂住去BBQ烧嘢食呀！不过，嚟到夏天A姐确实，热！到！不！行！了！但你话如果可以叹住冷气，有人烧埋俾你食，咁我又唔驱呀！怕热但又想食BBQ，其实一啲都唔矛盾。今日M佬就带我嚟到观塘嘅欢喜烧，食自动串烧放题，叹住冷气享受烧烤嘅味道，好满足呀！

串烧

呢度嘅串烧选择超过30款：包括鸡肉、鸡翼、羊肉、牛舌、一口牛、叉烧、腩肉、鸡肾、鸡软骨、菠萝、脆肉瓜、莴笋、粟米、丸类、红肠、厨师肠、蒜蓉包、棉花糖等。攞完嘢食之后，只要将串烧放上炉，佢就会好有规律咁旋转，除咗够晒方便，烧出嚟嘅食物亦都非常均匀。

我哋encore再encore嘅五大推介有：
牛舌 – 厚切嘅牛舌经过烧烤之后，让肉汁被锁住，好有口感，牛嘅肉汁丰富浓厚
腩肉 – 一层肥一层瘦嘅腩肉经过细火慢烤，将啲肥油迫晒出嚟，食嘅时候无咁大罪恶感，但仍可食到腩肉嘅juicy
鸡肾 – 非常爽口
叉烧 – 超入味，又够软腍
蒜蓉包 – 烧到脆卜卜，带有浓郁嘅蒜蓉香味

呢度嘅最大卖点係大部份食物都无经过预先腌製，但枱上放有日式蜜糖酱、马来沙嗲酱、泰式辣酱、辣味孜然粉、孜然粉同自家製香辣粉，无论想食重口味，定係好似我哋锺意淡口味嘅，都可以自行调味。

小食、熟食

係等紧串烧烧熟嘅时候，可以去到熟食自取区医吓肚先。今日嘅熟食选择有四样，分别係蒜蓉炒西兰花、咖喱鱼蛋、蒜香鸡翼同青口。至于小食就有芝麻八爪鱼、中华沙律、蒜味螺肉、泰式凤爪，全部都放喺雪柜入边，够晒卫生。

Order纸

除咗自取区，呢度嘅order纸嘢食即叫即做。想食菜嘅朋友，今日就有蚝油菜心苗、蒜蓉炒生菜同腐乳通菜，边个话食串烧就净係食肉?？另外仲有炸虾天妇罗同炸蚝等10几款熟食，不过就略嫌炸蚝嘅炸粉太厚喇。

另外，餐厅亦会每人送上一份茄子，茄子上面铺满炸蒜等香料，食嘅时候好香好好味。

<

Tags：好食,叹住,冷气,串烧,放题,骆驼,欢喜,Diary,今日,

转载：文章来自用户投稿不代表本站观点，如有侵权请联系我们。