[香港Staycation] 24小时食住玩兼有维港景打卡 平玩宜必思香港中上环酒店

【A&M Diary】以前去旅行，budget唔多，宜必思品牌绝对係一个唔错嘅选择！返到嚟香港嘅宜必思香港中上环酒店，除咗保持宜必思品牌一贯嘅水準，呢度仲附设无敌维港海景，加上呢个Staycation Package已包早餐、晚餐同房间mini bar，仲要住足24小时，性价比真係超晒班！瞓饱饱嘅我哋，黑眼圈仲细咗添呀！

酒店大堂

宜必思香港中上环酒店位于上环，距离上环港铁站大概10分钟步程。呢个24小时海景客房住宿套票虽然已包早、晚餐，但酒店附近就有超级市场同唔少食店，夜晚买宵夜返房食或补给日用品都好方便！

酒店大堂位于五楼，一开lift门就係贯彻宜必思酒店代表嘅橙红色，非常shape醒！大堂楼底虽然唔高，但窗户够多，透过天然光同户外景色，增加空间感。喺checkin过程，职员仲会详细讲解我哋今次staycation套票所包嘅每一个项目，同安排早、晚餐之时间，够晒细心。

喺reception嘅旁边，仲有一个微波炉同电脑工作室，相信係方便喺酒店内长期住宿嘅住客。

客房区域

酒店楼高32层，提供550间客房，而我哋今次入住嘅係位于31楼嘅海景客房。

一打开房门，背囊同行李都未放低，就被窗外嘅风景深深吸引住！风景以对岸嘅西九文化区同环球贸易广场为主，天气好嘅时候，仲可以睇到尖沙咀钟楼同文化中心，只係呢个日、夜景，已经值回票价。

房间面积虽然唔大，但楼底算高，唔会有压迫感觉，加上窗外广阔嘅风景，反而大大增加空间感呢！房间同样以橙红色为主色调，加上木系衣柜同书枱，贯彻宜必思酒店嘅设计风格。

呢度睡床係Queen size，床上放有2个枕头，喺衣柜内亦有一个备用枕头。床褥适中偏硬，如有需要，可以致电房务部加添额外嘅床垫。至于床单同被铺都非常柔软，加上窗帘嘅遮光度十足，完全可以瞓到自然醒呀！

另外，床嘅两边都有床头柜，方便摆放个人物品，例如眼镜同手提电话。其中一边设有充电插头，不过就未见有USB充电位，所以记住带埋插头嚟充电喇！

书枱嘅位置够晒长，面对住无敌海景，绝对係一个文昌位啦！至于书枱旁边嘅衣柜，除咗夹万，仲有雪柜。房间Mini bar提供2支免费蒸馏水、茶包、三合一咖啡、薯片同汽水。呢度除咗免费电视频道，仲有唔少卫星频道选择。呢个package已经包埋Mini bar，可以睇住电视剧叹零食啦！

浴室区域

作为经济型嘅酒店，个人用品除咗提供拖鞋，浴室内亦放有风筒、牙膏、牙刷、番枧同酒店自家嘅三合一沐浴露洗头水，如果惊用唔惯就记住自行準备喇！另外，如有需要，亦可致电Housekeeping，以借用熨斗、烫衫板及索取浴帽、剃鬚刀、针线包、卫生袋同梳等个人物品。

<

Tags：香港,Staycation,24小时,食住,兼有,维港,打卡

转载：文章来自用户投稿不代表本站观点，如有侵权请联系我们。