〈好游〉绝美东区打卡靓景　90分钟登上柏架山

【A&M Diary】90分钟可以做啲咩？可以睇套戏、食dinner、玩密室……但你又有无谂过90分钟可以行山兼登上港岛第二高峰呢？香港虽然係一个已发展城市，市中心人烟稠密，仲有唔少高楼大厦，但喺我哋身边都有唔少郊游远足路线，今次我就同A姐嚟到鲗鱼涌嘅柏架山，沿路轻鬆易行，除咗有劲多打卡位，仲睇到港岛东同九龙东嘅维港靓景，90分钟绝对值得！

前往方法
1. 喺鲗鱼涌港铁站落车，行至海山楼旁边嘅鲗鱼涌市政大厦，就係今次路程嘅起步点
2. 柏架山道虽然係行车嘅水泥路，但除咗的士、具通行证同政府车辆外，其他车辆係唔入得，自驾游嘅字母粉可以泊喺鲗鱼涌区内停车场

提提你
1. 由起步点至终点雷达站，路程约个半钟，全程为水泥路，唔算太辛苦，属于初级至中级路线，记住要量力以为
2. 沿路设有3个洗手间，但没有补给站，记住自备足够饮品
3. 大家记住保持环境清洁，自己垃圾自己带走，绝对唔可以破坏大自然环境

柏架山
位于港岛东区嘅柏架山海拔532米，除咗係东区嘅最高峰，亦係香港岛继太平山之后嘅第二高峰。柏架山嘅郊游路线亦属于大潭郊野公园（鲗鱼涌扩建部份）一部份。

林边生物多样性自然教育中心
详情：活化鲗鱼涌红砖屋由通识开始 林边生物多样性自然教育中心
林边生物多样性自然教育中心又名「红屋」係二级历史古蹟。前身为1922年嘅林边屋，係太古糖厂及太古船坞欧藉职员宿舍，楼高两层，外墙由红砖建成，属早期英式建筑设计。1972年因为太古糖厂结束营业而被空置。曾经活化成国际文化事务协会嘅红屋艺术展览中心，后嚟喺2012年由渔农自然护理署接手管理，并改建为林边生物多样性自然教育中心。教育中心内有唔少喺丛林生活嘅动植物介绍，绝对係一个适合亲子参观同学习通识嘅地方。另外，外墙嘅英式红砖设计亦係一个A姐推介嘅打卡热点！顺带一提，林边生物多样性自然教育中心内设有洗手间同提供免费斟水嘅地方，临走前就先补给吓啦！

开放时间：星期一、星期三至星期日及公众假期 09:30-16:30

鲗鱼涌树木研习径
详情：置身历史游走大自然 鲗鱼涌树木研习径
鲗鱼涌树木研习径除咗可以了解树木，仲有一个日战时期嘅军事遗蹟，係一个集历史同大自然嘅行山路线。但因为好多人嘅目标係柏架山雷达站，而为免兜路，所以就放弃呢条鲗鱼涌树木研习径，就继续沿水泥路往雷达站出发。我哋就建议为免消耗体力，可以选择回程嘅时候再作游览。顺带一提，呢度亦係一个交汇站，除咗鲗鱼涌树木研习径，旁边就係金督驰马径同康柏郊游径嘅入口。

柏架山道第一烧烤区
嚟到柏架山道第一烧烤区设有行程中第二个洗手间，而喺洗手间嘅旁边就有一个观景台同凉亭，各位字母粉可以喺呢度稍作休息同饱览鲗鱼涌嘅市景，而最高嘅建筑物就係东区最高大厦：港岛东中心（One Island East）。另外，喺烧烤区经常有野猪出没，大家记住同野生动物共融，唔好伤害佢哋亦唔需要餵饲佢哋。

大风坳
上到嚟海拔320米嘅大风坳，就完成咗大概5份之3嘅路程，记住去埋洗手间，因为呢个係上柏架山雷达站前最后一个洗手间喇！大风坳亦係多条港岛行山远足路线嘅交汇站，除咗可以去到今次行程目的地嘅柏架山，仲可以前往其他目的地，例如：毕拿山、小马山、港岛径、野猪径同大潭水塘（详情：超靓石桥週末郊游 大潭水务文物径）等地方。另外，字母粉记住唔好错过大风坳嘅野餐区，呢底可以俯瞰大潭水塘嘅景色。

大雷达站
离开大风坳之后，就要由320米登上532米嘅柏架山。中途亦设有凉亭同长凳可以稍作休息，景观就以香港东海岸一带为主，够晒开阳。一直行直至见到分叉路，左边就係小雷达站，而右边就係大雷达站，而我哋就先去大雷达站。有唔少人会叫大雷达站做大波波，呢个大波波係2004年启用，用以探测天气或覆盖範围内嘅航机距离同高度等资料，以确保航空交通安全。雷达站係闲人禁止进入嘅区域，喺门口影完相，都唔好咁快走住，大雷达站旁边设有一条小径，由小径行入去，就会睇到柴湾、小西湾、东龙岛同石澳全景，真係好靓呀！

<

Tags：好游,绝美,东区,打卡,靓景,90分钟,登上,柏架山,Dia

转载：文章来自用户投稿不代表本站观点，如有侵权请联系我们。