〈好食〉蛇王二强势回归 湾仔蛇王易

【A&M Diary】相信你一定知道失而复得嘅感觉，但如果失而复得之后，你仍然唔识得珍惜，咁真係无话可说喇！曾经喺铜锣湾开业多年，未食过都一定经过嘅蛇王二，原来由原班人马喺湾仔重开，新开嘅舖头重新命名为蛇王易，餐牌同以前大致一样，除咗蛇羹，仲有糯米饭同烧腊饭，够晒港式地道。

秘製菊花蛇羹
有人话「秋风起，最啱食野味」，但喺香港，蛇係唯一可以合法食到嘅野味，所以每年嘅秋冬季节，香港人就锺意食蛇宴补身暖胃。蛇王易嘅菊花蛇羹材料十足，汤色清澈但味道浓郁，蛇肉比例多，唔腥又够鲜甜，浓稠适中，味道好有层次。蛇羹表面放上几片有清肝明目功效嘅菊花，又可以增加蛇羹的清新口感。

淮杞炖竹丝鸡汤
A姐唔食蛇羹，所以就叫咗一个炖汤俾佢，炖汤原汁原味，够晒足料，入面有一大旧乌鸡鸡胸肉同乌鸡鸡全翼，当然仲有唔少淮杞啦！炖汤无加味精，汤色清澈池，味道鲜甜。

腊味糯米饭
冬天除咗食蛇羹，又点少得糯米饭呢位朋友呢？糯米饭有好多腊肉同虾米，糯米饭索晒佢哋嘅香味，油香十足，加埋花生一齐食令口感大大提升。我哋特别加咗半条腊肠同半条脆皮膶肠，脆皮膶肠係呢度嘅名物，个皮真係超级脆，而且肝味浓郁，爆juicy。

脆皮烧肉配烧鹅饭
烧腊饭亦係呢度嘅代表，烧肉一层肥一层瘦，一啲都唔油腻，当然最正就係烧肉皮，超脆呀！另外，烧鹅嘅鹅油十足，皮香肉滑。

<

Tags：好食,蛇王,强势,回归,湾仔,Diary,相信,一定,知道,

转载：文章来自用户投稿不代表本站观点，如有侵权请联系我们。