〈好食〉人气香浓车仔麵 湾仔车仔麵之家

【A&M Diary】喺金钟返工嘅你，唔知会唔会觉得食lunch係一大难题呢？金钟嘅餐厅选择话多唔多，话少唔少，但排队绝对係一大挑战！有时唔想等咁耐，买件三文治同杯咖啡，咁就一餐喇！但嚟到冬天，总想食碗热辣辣嘅麵呢！如果你都有同感，我推介呢间位于金钟同湾仔交界嘅车仔麵之家，价钱够晒抵，所以一直都人气高企。虽然繁忙时间都要排队，但始终车仔麵够晒快手。但要留意，店内只有几个立食位置，人多嘅话不如买外卖返office食啦！

A姐之选：牛腩、甜酸斋、猪红配小油麵（中辣）
呢度嘅麵底份量分为大、中、小，如果肚饿嘅当然可以叫大size，不过我哋觉得细size就约等于平时食开嘅份量。A姐首推够晒脆嘅甜酸斋，酸酸甜甜之外，索埋辣嘅汤汁，味道真係好有层次呀！另外，猪红亦相当唔错，唔会散又够滑！

M佬之选：鸡翼、冬菇、炸墨鱼腐皮卷配小米粉（中辣）
冬菇份量超多呀，而且好入味！炸墨鱼腐皮卷炸到脆卜卜，入面仲有粒粒墨鱼，係唔错嘅选择。鸡翼就大大只，係抵食之选！但记住记住一定要加辣汁，真係好香浓，好好味?！

<

Tags：好食,人气,香浓,车仔,湾仔,之家,Diary,金钟,返工,

转载：文章来自用户投稿不代表本站观点，如有侵权请联系我们。