〈好食〉湾仔英伦酒店The Hari　叹意式风味Lucciola Restaurant & Bar

【A&M Diary】放假就梗係要去玩啦！加上就嚟情人节，所以M佬就带我去到The Hari Hong Kong玩Staycation，The Hari Hong Kong以英伦为设计主题，无论酒店嘅硬件定软件都令我哋留下深刻嘅印象。另外，酒店设有两间餐厅，分别係日式餐厅Zoku同我哋今次嚟到嘅意大利餐厅Lucciola Restaurant & Bar。Lucciola餐厅设计充满古典气息，主厨Francesco Gava希望食客嚟到Lucciola，可以品嚐到多种带有传统风味同现代特色嘅意大利菜式。

食西餐又点少得麵包呢？喺落完order之后，店员就会奉上热辣辣麵包，呢度提供3款选择，有香脆亦有软熟嘅选择。

Il Carpaccio di Ricciola
落order嘅时候，店员推介我哋试吓呢个前菜。其实我初初对呢样嘢係完全无概念，直到上枱嗰刻，见到红卜卜咁，仲好担心会好腥添，但原来真係无介绍错，好好味呀！其实Il Carpaccio di Ricciola即係将油甘鱼切成薄片，红卜卜嘅其实係红洋葱同车厘茄酱汁。油甘鱼好新鲜，切到薄薄一片，入口好滑，配埋个酱汁一齐嚟食，酸酸哋都几开胃！红洋葱仲增加口感，唔错！

Scampi al Forno Olio e Limone
另一款前菜，我哋选择咗Scampi al Forno Olio e Limone。呢款虾同平时食开嘅唔一样，佢用嘅虾係有钳，然后将佢开边，加入阿玛菲柠檬同橄榄油烤焗而成。虾本身够新鲜，好鲜甜，仲有唔少虾膏添！另外，因为虾本身已开边，食得够方便之余，仲入晒味添。

La Tagliata di Costata Di Manzo
主菜方面，我哋就叫咗肉眼扒。我一向都锺意食三成熟，牛扒嫩滑，牛汁丰富，厨师仲预先将牛扒切开一件件，食得够晒方便。配菜方面就有火箭菜同薯仔，火箭菜带有牛汁，盖过原有嘅苦涩味。

Filetto di Gallinella All’acqua Pazza
另一个主菜，就选择咗海鲜，里面有鱼柳、青口同蚬。鱼柳无骨，啖啖肉，外皮煎到好香口；青口同蚬嘅份量好多，虽然略嫌蚬比较细粒，但确实好鲜甜。重点就梗係海鲜味浓郁嘅汤汁啦，正！

<

Tags：好食,湾仔,英伦,酒店,The,Hari,叹意,风味,Luc

转载：文章来自用户投稿不代表本站观点，如有侵权请联系我们。