〈好游〉超靓石桥週末郊游　大潭水务文物径

【A&M Diary】平时返工成日对住部电脑，放假就梗係想去下郊游，呼吸一下新鲜空气啦！今次我同A姐就嚟到大潭水务文物径，够晒简单易行，仲有好多欧洲式石桥，如果秋冬季嚟有红叶睇；如果夏季雨后，仲有机会见到难得一见嘅排洪添！啱晒大家影相打卡，玩足一日！

提提你
1. 由黄泥涌峡起步到大潭笃水塘，沿途係落山石屎斜路，全程5公里，共有10个文物径资料站牌，步行需要2小时。适合行山初哥同一家大细，但都要量力以为呀
2. 沿路无士多补给站，大家记住自备所需用品。至于洗手间设于起点后15分钟位置同终点位置
3. 大家记住保持环境清洁，自己垃圾自己带走，绝对唔可以破坏大自然环境

前往方法
乘坐新巴/城巴6、41A、63、66或76，于黄泥涌水塘公园站落车，往阳明山庄方向行，黄泥涌峡起步点正正喺阳明山庄旁边。

大潭水塘
包括大潭上水塘、大潭副水塘、大潭中水塘及大潭笃水塘，喺1888年至1917年间分期落成，係香港岛食水嘅主要来源，统称为大潭水塘群。2009年9月18日列为法定古蹟。

阳明山庄起点
阳明山庄旁边有多个郊游径入口，记住唔好去错，今次目标係大潭水务文物径。

秋冬限定：红叶
行咗大约10分钟，就会见到一个凉亭，抬头望上去，就会见到枫香树喇！

整段路程中，最受大家欢迎就係四座石桥，石桥用花岗石建成，以半圆拱形结构，并以多条巨柱承托，真係好有欧洲feel啊！

大潭上水塘
睇完红叶之后，行大概15分钟就会去到文物径嘅第一个景点：大潭上水塘。薄扶林水塘喺1869年落成后，食水仍然供不应求，所以当时港督坚尼地喺1873年提出大潭计划，选址大潭谷兴建香港第二个水塘，而首期工程喺1888年完成，可储存3亿加侖食水，后被名为大潭上水塘，并以石桥同输水道连接其他道路同水道。

大潭上水塘水坝
建于1883-1888年，水坝高27.4米、长121.9米、阔18.3米，係第一期大潭计划中最大嘅项目。

<

Tags：好游,超靓,石桥,週末,郊游,大潭,水务,文物,Diary,

转载：文章来自用户投稿不代表本站观点，如有侵权请联系我们。