〈好游〉石澳一天游 鹤咀食买玩

【A&M Diary】近期石澳鹤咀成为大热嘅行山郊游路线，除咗路线唔难行，风景又靓，有灯塔、海蚀洞同一望无际嘅南中国海海景之外，仲有豆香十足嘅豆腐花同石澳必买手信，今个weekend好去处就同A姐嚟个鹤咀食买玩一日游啦！

前往方法
喺筲箕湾坐红色小巴或9号巴士往石澳，于中途站「鹤咀」落车，步行约40分钟到达灯塔。鹤咀属于海岸保护区，驾驶人士必须持有禁区证先可进入，所以自驾人士可以将车泊喺筲箕湾，再转乘公共交通工具。

提提你
1. 作为旅客嘅我哋记住要保持宁静，唔好影响当地人嘅生活呀
2.上落波幅唔大，适合初级行山人士，整个行程係沿路往返，记住要量力以为。起步点附近有流动洗手间，中段有士多补给站，帮衬士多可以免费使用店舖内嘅洗手间

分叉路
一直沿住鹤咀道行，呢条路係石屎嘅行车路，所以大家行嘅时候要小心车辆。

行到中段有一个分叉口，记住靠右边行，经过芽菜坑村，就会去到鹤嘴嘅海岸。当看到无线电台範围及「私人地方，不可擅进」的路牌，绕过它，从旁边草地前进便可。

鹤咀灯塔
又称德忌立角灯塔 (Cape D’Aguilar Lighthouse)嘅鹤咀灯塔喺1875年4月16日落成启用，当时造价HK$15,000，係香港第一座灯塔，亦係本港现存五座战前灯塔之一，喺2006年被列入香港法定古蹟。

鹤咀灯塔高9.7米，充满浓厚古典色彩。作为香港南部最重要嘅灯塔，射出嘅灯光可以远至23海里以外嘅水域。虽然曾被1893年启用嘅横澜岛灯塔取代，但喺1975年改为自动化操作后，一直服务至今。

海岸保护区
鹤咀海岸保护区係香港唯一一个海岸保护区，保护区範围包括鹤咀半岛嘅北部、东部及南部水域，亦包括狗髀洲，海域面积大约20公顷，由香港大学太古海洋科学研究所协助管理。保护区内有各种鱼类、石珊瑚、软珊瑚、柳珊瑚等海洋无脊椎动物，大家嚟到海岸保护区，记住遵守保护区嘅法律，唔好带走任何岩石同海洋生物，亦唔好留低任何垃圾，做个有公德心嘅游客。

鹤咀海洋研究所
今日嚟到，研究所正在进行工程，而研究所出边就有一副鱼骨标本，原来係一条1955年喺维港搁浅嘅鬚鲸，虽然经过岁月洗礼，日晒雨淋，但仍亮白如新。不过部份鱼骨就遭到途人参观时破坏，所以大家都係记住做个有公德心嘅游客喇。

<

Tags：好游,石澳,一天,鹤咀,食买,Diary,近期,石澳鹤,成为

转载：文章来自用户投稿不代表本站观点，如有侵权请联系我们。